هو ده حال الزمن لا بيسيب اللى ماشى ..ماشى ,ولا اللى قاعد.. قاعد ولا اللى بيكتب..بيكتب ,فانا مثلا كنت فشبابى عفى..قوى.. مايهمنى الشديد القوى ,ايامها كنت شغال مع واحد جرنانجى ..كان زى الفل ,بيكتب ف الرياضة زى الحلاوة  وفالفن زى الموس وحبب الاموات ف صفحة الوفيات وكان محبوب جدا لخفة ظلة ..وعشان كدة الوزير الفلانى شجعة والمسؤل العلانى رقاه , وراح كل يوم حفلات وندوات وعزومات ...وهكذا,.

لحد ما جه يوم عرض علىّ فكرة الكتابة ف باب دايما بينفد ع الوفيات!

انا عرفت كده قلبى وقع ف اللبيسة,مانعته..قاومته..وقفت ع الورق واتسمرت ,لكنه دايما بيكون اقوى منّى- اصلة عفى جدا..

زقنى بعزم ما فية,

 قاومت..عافرت..زهقت..طهقت..كتبت..ندمت!!

وبعد اول ليلة من تنفيذ الفكرة ,وف نص الليل واحنا قعدين ع المكتب بنشتغل كالعادة..لقينا الباب بيخبط بشدة!..استغربنا جدا ,يا ترى مين اللى هيجلنا الساعادى؟؟!

وقبل ما يفكر صحبى يروح يفتح الباب لقى الباب هو اللى جاى علية انا شفت كده حبرى نشف وقلبى انخلع من مكانه,امّاصاحبنا الجرنانجى اتنطر من ع الكرسى اللى كان علية ,مين اللى نطره واتنطر ازاى ..ما شفتش,الحاجة الوحيدة اللى شفتها لقيت ايد مش عادية بتنتشنى من ايد صحبى وبتحدفنى بقوة ف نص الحيطة بعدها فقدت الوعى .

وبعد ما فقت م الغيبوبة لقيت سنى مكسور مع وجود بعض الكدمات ف الانبوبة,ولقيت الدكاترة بتقولى انى مصاب بشلل نصفى وهتلاقى صعوبة ف عملية الاخراج..لكن مع العلاج الطبيعى هتتحسن.

وبعد كام يوم- وانا بقراء الجرايد زى العادة -  لقيت المقال اللى كتبناه انا وصحبى مكتوب بالبنط العريض ف الجرنال ,فرحت له جدا ,وف الصفحة اللى وراها لقيت مانشت بنفس البنط بيقول " انتحار الجرنانجى عبده المدب بسبب صدمة عاطفية حادة " .

استغربت جدا:بقى عبده المدب ينتحر عشان صدمة عاطفية؟! وكمان حادة !!, ده ما يعرفش شكل الحريم ايه!

وما قدرتش اتحمل الصدمة واتصبت بشلل عام خلانى القى صعوبة ف المشى ع السطر ,ومانعنى الدكاترة من كتابة اى كلمة فيها حرف السين, وبعد سنين..اتحسنت وبقيت اقدر اتنقل ع الورق, ولقيت لى شغلانةفى مؤسسة حكومية وكان شغلى ينحصر فى حل الكلمات المتقاطعة,....بزمتكم مش احسن من الاعدة؟؟