السبت, 23 ديسمبر, 2006
يا مخزن الاشواق يا مدرستى
يا ململمة كل القلوب الخضر
ريحة الزهور فى المريلة اترسمت
والزمزمية فى رقاب السمر
وبياعين على بابها تسترزق
بضاعة مهادى واطفالى
حب العزيز والنباء والتفاح
ويستفندى وبرتقان اخضر
والبخت فى العسلية يا فتّاح
قرطاس سعادة واللى فيه اكبر
على بابك انتى عشقت معنى البخت
عمرك ماتبقى فى بختها خاسر
لو حتى فزت وكنت مش خاسر
طعم المكاسب يقطم الكسرة
لما تلاقى مكسبك قشرة
من بياعين على بابها تسترزق
على وشهم ميت بورتريه للفقر
متلونين بالوانات الصبر
وليه يكون العيش فأكله مر
والقلب عمى... والضمير خالى
والبياعين على بابها تسترزق
بضاعة مهادى تضج حنين
تكبر ما نكبر واللى تاب مفقود
ترمس وجميز النشانجيه
خرشوف اصيل تصاوير طبيعية
خد الجميل والحسن متضفر
جار مرجحات نركبها نتمطوح
والشمس قاعدة جنب فرشتها
بتوزع الاحساس فى صورة دفا
خد منها ما يكفيك بحب ووفا
والدفع لمّا الحساب يجمع
***
ووسط زحمة بياعين الفرح
لمحت واحدة قاعدة بمشانّة
مليانة طوب طوبى وزىّ الصخر
سألتها يا ام الكفوف جنة
ازاى تبيعى الصبر للتلاميذ
ضحكت وقالت : دوقه بس لذيذ
اخدت قطمة دوبت ، والتانية
فهمت معنى ارتجال الكدح
قلبى المهندم بالكسوف انحرج
من ضحكة الغجرية على جهلى
وقولها دوّت " دوم " يا نور عينى
من يومها صار" الدوم " ده نور عينى
ووشها ف الفكر سهم انحشر
مع بياعين على بابها تسترزق
***
الصبر طيب والفراق ابليس
الصبح صبّح غطّى ع الفوانيس
الساعة سبعة العلم جاله اوان
افتح لنا البوابة يا رضوان
نترش فى حوش الميدان مسامير
حناجرنا فى توب التحية نفير
اضحك بفرحة فى عيون العلم
مناجى نسره بالجناح مفرود
تحياك يانسر ياللى بتربى
يا شاهد انى فى الزمان موجود
لو بس اطولك ياللى ساكن فوق
لكنت اشيلك من علم بلدى
واخط لك ساحتين على خدى
دا الشبر منهم ملك ماله حدود
تحياك يا نسر ياللى ساكن فوق
يا شاهد انى فى الزمان موجود
<<الصفحة الرئيسية
