ده رأيي الشخصي في سيادتي

وفيك بموت 

وبحلم بيكى يا ستى

تكوني سريري وملايتى

مخدة تبات في أحضاني ..

ساعات الشوق

ولما الحلم يتباعد

أحطك تحت جمجمتي .

كوني لى ساعة خربانة 

عليها اضبط مواعيدي

معاد سفري

معاد مشيك

ميعاد حيرتي وتنهيدي

كوني لي ..

كتاب ونضارة

وواحد شاي ف خمسينة    

كوني لي قهوة سهّارة

وكوم أوراق وسكينة ..

تمزّعني ..

توزعني على بعضي

فنتعرف .. ونتقارب

ونتألف ..

ونتماسك

وافضل فيكي أنا ماسك

وأكون اهلك

أكون ناسك

وعرّف نفسي قدامك

أنا العاشق عنيك السود

أنا المختل ..

أنا الهلفوت ..

وفيك بموت

قولي لي الحل

أنا حرماني من نفسي ..

ومن غيري

سنين وشهور ..

وكام لحظة وكام ساعة

بحبك بدري ف الشارع

كده ف الطل

ولما عرفت أدماني

وشوقك جي متأخّر

عشقتك حلم بيفكر ..

سحابة شمسها تكبر

وانك لسه نجماية

حياتك للحياة داية

تولد كل يوم ليلة

وبتهنن..

وبتدلع..

وبتلبّس..

وبتقلّع..

ولما ولدها يسخن

علية تسهر

علية تدمع

ولما يفوق ويتعفرت ..

معاه تلعب

أليه تسمع

وتخلق جوه كراسة حكاوي

تبنى أفكاره

وترسم فيها بنوتة

أنوثة بألف حدوتة

نهايتها تخلى الضحكة بتكركر

ومهما أحكي

ولا هقدر أوصّف فيك شعراية

ولا هقدر احدد حجمك السفروت ..

ف أحضاني

ولا هقدر أجيبلك حتى ورداية

تضاهى لمسه من صبعك

ولا هالقى ..

في سوق الصاغة دبلاية

على قدك

ما أنا جنبك عاشق ايوة

لكن ..

هلفوت

 

waldkhyban@hotmail.com  

waldkhyban@yahoo.com