الاحد, 03 سبتمبر, 2006
1
وشك يا مصرية سبحان من رسمه
سبحان من قسمة على القلوب كافه
سبحانه من علمه فعل الملاغيه
درسين وبتعلمه
انثى ونجميه معجونه بالخفه
الرفّه من جفنها
تلعب بنا الرفّه.. رغم المداريه
*
كل النساء كافه
وانتى اللى ف الكفّه
على صوت غناكى القمح ..
بجلاله اتسنبل
فى ضوء كانون شفناه
غافى بيتدفى ..
على وش مصريه
2
وشك يا مصريه بيضج بالثورات
فوق خدك الونّاس
الضحكة تبقى حارات
من درب غمّازة
عيلها م الجنه
صخبها ليه رنه
ينفع يكون مدنه .. بترشرش الايمان
ومدرسه خارجه ..
اولادها بتدايق ف بنات حديث النهد..
عايقة وتتعايق لجل الملاغيه
تعشقها تلميذة ..
تلقاها جنيّه
طفلة رومانسية فوق الجمال حافيه
ماسكه ف كراسه
متروسه جغرافيا حسنك يا مصريه
*
على كفها تتولد
وفحضنها تتلحد
يا بخت مين ينحسد من نظرة عسلية
من وش مصريه
3
وشك يا مصريه فيه الدفا وداد
هرس القلوب غيّته
فيه الحيا غلاب
حجار مع الحجرى
مع الحديد ..حداد
صنيعى عشق و هوى
وكله ب المقاسات
فصلت عنده انا ..
كلمة تراضينى
بوسة تقوتنى
لفته تصحينى
لمسه تموتنى
نوته تفكرنى بناس متعرفنيش
وناس تعرّفنى
سر الحياة نغابيش
ع القلب مرسومه
وقطن ف المحلاج .. زاهد بيتقطن
على وش مصريه
4
صنيعى عشق وهوى
وكله ب المقاسات
احفظ بقى ابعادى .. ياسطى
وفصل لى
بفيونه لاعصابى
وبفيته لمشاعرى
كرافته ف رقبتى
وطاقيه فوق شعرى
وجاكته تحمينى
جلبيه تستورنى
افارول يقوينى
ورايه تنصورنى
ولا حد يكسرنى غير رب ذاك الوش..
روحوا فصلوا عنده
الورشه متتوهش
عنونها تفصيلى
على ضفتين نيلى
لو رحت بس اسأل
" فين وش مصرية ؟ "
<<الصفحة الرئيسية
