أنا ابن شبرا

وشبرا عندي يعنى قصر

هيه المدينة العاصمة

 لحبيبتي مصر

2

شبرا بلد

فيها عزب كحيانه موت

وكمان شوارع ابهه

فيها الفقير جنب الغنى

والمسلمين جنب النصارة واليهود

فيها الدفى ويا البرود

تلقى الشقي والطيب السهل الكشر

جنب الخبيث ويا الحشر..

قعدين ف حارة أو زقاق

من غير عراك.. من غير خناق

من غير ضغينة أو شرور 

3

شبرا بشر جدعان قوى       

وبناتها يوه .......

حلوين قوى

تضحك توقع ألف شب

تلعب بمليون ألف قلب ..

ماهى بنت شبرا

يعنى بنت مخربشة

تهوى المحبة والدفى

تعشق هزار الفرفشة

عند الخطر تلقاها ..

فنان خربشة

ماهى بنت شبرا

فيها ضفاير أم حكمة جدلها

وشعور طليقة ف الهوى

حبة يخدها الريح يمين

وشوية يحدفها شمال ..

على ضهر نصه مستغطى بالعرى

وهناك ورا

جدعان كتير جعنين هوى

إحنا كده ..

نعشق حرارة حر لكن لو أخدنا بختنا

نجرى ورا القيد والضنا

4

وأنا من هنا

من حي شبرا المستنير برمي السلام

م " الترعة " و "خلوصى " و " طوسون "

" روض الفرج " و " الصفتى " و "عرابي " الجدع ..

راح الوجع من شارع " الورشة "  و " مسرة " ..

كنا ف جره يا أهل شبرا

وبيها صرنا ف ألف بره..

وبره دية جوى شبرا

وشبرا عندي يعنى قصر