يوماتى أمشى  فى الشارع

مخطط بالخطاوي اسمك ..

على الماهل

أمسّى ع اللى سهرانه لحد الفجر

ف البلكون

وجوى قلبها زيطة ..

وثوراية

ولد بحصان بيسترزق

شعاع الحب فى عيونها

فيتمزق .. وتتفتفت

     *     *     *

صحيح الحب عفينجى على الاعصاب

وسايق ف العوج ديما

لكنه - خمسه وخميسه -

على العاشق كما البلسم

(2)

يوماتى امشى فى الشارع

مسطّر كل منطقتك بانفاسى

امر بكل احساسى

على اللبان قصاد بيتك

محل الورد ..

والكوفير ..

وقهوى عليها تتعكسى

محطة فوقها تنتظرى

يوماتى الصبح مشوارك

وتاكسى بالغرام مكسى

يفوت جارك

يهدى بلمحته صبعك

يشاور له..

" صباح الحب يا سمره

يا اول عشق واستفتاح ..

صحيح الرزق م المولى

ومنه العشق بجنونة

لكنه يمهل العاشق ..

بداءه المر

ويترك لوعتة تصونه

(3)

يوماتى أمشى فى الشارع

أعدى جنب مدرستك بأسورها

صوبعى تدوب وتتخيل

وصولها حد باب فصلك

تخش تمسى ع الطباشير بألوانه ..

وتلطع بوسة ع التختة

وتنقش ع الدكك بالاسم

حبيبتى " فلانه " ست الحسن

وهيه أحلى بنوتة

تلقت علم فى التعليم

وتقرا تصريحات صبعى

بنات الفصل .. يتلحسوا

وينهيريوا..

وينكادوا ..

وتبقى وحدك الملكه على قلبى

ويبقوم هما حسادوا

وقوم اجرى ..

واجرى جرى م الناظر ..

ليعبط فيا اشهارى لمعشقتك

لكنى عند بوبتك

الاحظ اننا سبتك فى قلب النار

فارجع لك..

صحيح الروح تلاقى الموت

فتعرف انها حلوة

لكنى لو لقيت الموت

بيجرى ورايا ووراكِ

راح ارمى نفسى ف احضانه ..

عشان السكه توسعلك

(4)

يوماتى امشى فى الشارع

ورجلى م الهوى دابت

طريقك ع لاقدم بارى

وقدمى يبقى مبرى عليه

ابطل مشى فى هواكِ؟؟

وابطل ليه !!

صريع العشق محسوبك

 وتربيتك

ومين يعرف حدود الحن

فى عيونك..

وطعم الجن فى شفيفك

يصير دواسه لعتابك ..

وجرّة ميه لخيولك

       *     *     *

صحيح الحب متبغدد على العاشق

وابن لذينة وموالس

لكنه - والحنين يتقال -

بيخلق م العجز فارس

يوماتى يمشى فى الشارع

يحب ف ارض دوستيها

يمكنكم تحميل القصيدة بصوت المدون من هذا اللينك

http://www.4shared.com/file/51924953/866f8c2a/__online.html